Теннисші Михаил Кукушкин мансабын аяқтайды

Қазақстан теннисінің тарихындағы ең жарқын тұлғалардың бірі Михаил Кукушкин кәсіби спорттағы мансабын аяқтайтынын мәлімдеді. 38 жастағы теннисші үшін соңғы турнир биыл қазан айында Алматыда өтетін Almaty Open ATP 250 жарысы болмақ.

Бұрын әлемдік рейтингте 39-орынға дейін көтерілген және ұзақ жылдар бойы Қазақстан құрамасының көшбасшысы болған спортшы бұл шешімін әлеуметтік желі арқылы жариялады.

«Достар, жанкүйерлер және менің теннистегі жолымның бір бөлігі болған барша жандар. Кейде тоқтап, артқа қарап, “Рақмет!” дейтін сәт келеді. Бүгін сіздермен оңай қабылданбаған шешімімді бөліскім келеді. Кәсіби теннистегі ұзақ жылдардан кейін биыл спорттық мансабымды аяқтаймын. Менің соңғы турнирім қазан айында өтетін Almaty Open ATP 250 жарысы болады.

Шынымды айтсам, дәл қазір сөз табу қиын. Теннис мен үшін жай ғана жұмыс немесе спорт емес еді. Ол – менің өмірім болды. Бала күнімнен бастап теннис маған армандауды, күресуді, жеңілісті қабылдауды, жеңістің қадірін білуді және ешқашан берілмеуді үйретті.

Осы жылдар ішінде бәрі болды: қуанышты сәттер де, көңілсіз кезеңдер де, жарақаттар да, қайта оралу да, үлкен жеңістер мен ауыр жеңілістер де. Бірақ дәл осы жол мені бүгінгі тұлға ретінде қалыптастырды.

Әрдайым жанымнан табылған отбасыма, командама, бапкерлеріме, достарыма, серіктестеріме және, әрине, жанкүйерлеріме шын жүректен алғыс айтқым келеді. Сіздердің қолдауларыңыз кейде күш-қуатым сарқылғандай көрінген сәттерде де алға жылжуыма көмектесті.

Кортқа шыққандағы сезімдерді, стадиондардың ерекше атмосферасын және әлемнің түкпір-түкпіріндегі трибуналардан естілген қолдау дауыстарын ешқашан ұмытпаймын.

Қазан айына дейін әлі уақыт бар. Алда тағы бірнеше турнир, жаттығу, эмоция мен естелік күтіп тұр. Соңғы матчқа шыққанда да мен оны бала күнгі үлкен арманы бар кішкентай бала секілді күресуге және ойыннан ләззат алуға деген құлшыныспен өткізетін боламын.

Тенниске бәрі үшін рақмет. Осы ғажайып сапардың бір бөлігі болған әрқайсыңызға алғыс айтамын. Қазанда жүздескенше!», – деп жазды Кукушкин.

Тәжірибелі спортшы өзінің отбасысына, бапкерлеріне, командасына және жанкүйерлеріне ерекше алғыс айтып, олардың қолдауы қиын кезеңдерден өтуге көмектескенін атап өтті.

Михаил Кукушкин 2008 жылдан бері Қазақстан атынан өнер көрсетіп келеді. Осы уақыт аралығында ол ұлттық құраманың негізгі ойыншыларының біріне айналып, ел теннисінің халықаралық деңгейде танылуына зор үлес қосты.

Теннисшінің Дэвис кубогындағы көрсеткіші де ерекше назар аудартады. Қазақстан құрамасы сапында ол 29 жеңіске жетіп, 21 рет жеңіліс тапқан. Оның қатысуымен ұлттық құрама бес мәрте турнирдің ширек финалына дейін жетті.

Кукушкин мансабында әлемдік теннистің көптеген жұлдыздарын жеңді. Олардың қатарында Марин Чилич, Стэн Вавринка, Григор Димитров, Давид Феррер, Гаэль Монфис және Хуан Мартин дель Потро секілді атақты спортшылар бар.