Отандасымыз WTA Live рейтингісінде бірден 289-орынға көтерілді
Қазақстандық теннисші Зарина Диас Курумеде (Жапония) өтіп жатқан ITF W50 санатындағы халықаралық турнирдің финалына шыққаннан кейін жанкүйерлеріне мақсатын айтты.
Қазіргі уақытта әлемдік рейтингте 318-орында тұрған отандасымыз күншығыс еліндегі сында 6-нөмірмен тіркеліп, өнер көрсетуде.
Ол желіде жазба жариялап, турнирде жеңімпаз атану үшін барын салатынын жеткізді.
«Жапониядағы турнирдің финалына шықтым. Алға!», - деп жазды теннисші.
Естеріңізде болса, Зарина Диас жартылай финалда Қытай өкілі Мэйлин Ванмен (WTA №336) кездесіп, аса тартысты матчта 2:1 (6:3, 3:6, 7:5) есебімен жеңіске жетті. Аталған ойын 2 сағат 16 минутқа созылды.
Енді отандасымыз финалда жапондық Аяно Шимицумен (WTA №288) өзара мықтыны анықтайды. Аяно жартылай финалда жапон теннисшісі Михо Курамотиден (№391) басым түсті.
Зарина Диас Жапониядағы жарыстағы көрсеткіштері бойынша WTA Live рейтингісінде бірден 289-орынға көтерілді.
