Бүгін Жәнібек Әлімханұлына қатысты маңызды шешім қабылданады

8 қаңтар қазақстандық кәсіпқой боксшы Жәнібек Әлімханұлы үшін шешуші күн болуы мүмкін. Бүгін спортшының допингке қатысты B-пробасы ашылады, оның нәтижесі боксшының алдағы мансабына және чемпиондық белбеулерінің тағдырына тікелей әсер етеді.

Допинг-тест нәтижелері бойынша қабылданатын шешім қазақстандық және халықаралық спорт қауымдастығында кең талқыланып жатыр. Бұл іс спортшының беделіне, рингке қайта оралу мүмкіндігіне және элиталық дивизиондағы орнын сақтап қалуына ықпал етуі мүмкін.

Жанжал желтоқсан айының басында шықты. Әлімханұлының кубалық боксшы Эрисланди Лара-мен 6 желтоқсанда өтуі тиіс жекпе-жегі тоқтатылды. Кейінірек ұйымдастырушылар Лараның орнына колумбиялық боксшы Йохан Гонсалес рингке шығатынын хабарлады.

Жекпе-жектің тоқтатылуына америкалық журналист Дэн Рафаэль жариялаған ақпарат себеп болды. Ол VADA есебіне сілтеме жасап, қазақстандық боксшының сынамасынан мельдоний табылғанын мәлімдеді.

Алайда Жәнібек Әлімханұлы бұл айыптауларды жоққа шығарып, «таза спорт» қағидаттарын ұстанатынын айтты. Оның сөзінше, алғашқы тест теріс нәтиже көрсеткен, ал спорттық қоспалар құрамын ол өзгертпеген. Осыған байланысты боксшы қайта тексеруді талап еткен.

Қазақстанның кәсіпқой бокс федерациясының президенті Рахимжан Ерденбеков асығыс қорытынды жасамауға шақырды. Оның айтуынша, қазіргі таңда допингті әдейі қолданғанын дәлелдейтін бірде-бір заңды құжат жоқ.

Ол сондай-ақ оң нәтиже әрдайым қасақана бұзушылықты білдірмейтінін атап өтті. Мұндай жағдайға ластанған қоспалар, медициналық препараттар немесе сынаманы сақтау барысындағы қателіктер әсер етуі мүмкін.

Қазақстан Республикасының Туризм және спорт министрлігі де істің соңғы шешімі шыққанға дейін спортшыға толық қолдау көрсететінін мәлімдеді.

Қандай қауіп бар?

B-пробаның нәтижесіне қарай Жәнібек Әлімханұлы:

• IBF және
• WBO

чемпиондық титулдарынан айырылуы немесе уақытша/ұзақ мерзімді дисквалификация алуы мүмкін.

Егер B-проба теріс нәтиже көрсетсе, іс толық жабылып, спортшының мәртебесі қалпына келтіріледі. Ал оң нәтиже расталса, мансаптың жалғасуы мүмкін болғанымен, беделге елеулі соққы тиетіні анық.

Жәнібек Әлімханұлы – орта салмақтағы Қазақстанның ең табысты боксшыларының бірі. Ол:

• 2022 жылы уақытша WBO чемпионы атанды,
• кейін толыққанды чемпион мәртебесін алып,
• WBO титулын бес рет сәтті қорғады,
• 2023 жылдың қазанында Германия өкілі Винченцо Гуальтьериді нокаутқа түсіріп, IBF белбеуін жеңіп алды.

Соңғы рет ол 5 сәуірде Астанада титулын қорғап, содан бері рингке шыққан жоқ. Қазіргі уақытта боксшы тергеу аяқталғанға дейін жарыстардан уақытша шеттетілген.