Бұл бассыздықты төрешілердің ешбірі байқамаған
Таиландта өткен бокстан Азия чемпионатында 71 келіде өнер көрсеткен қазақ боксшысы Абылайхан Жүсіповті өзбекстандық Хавасбек Асадуллаев тістеп алған. Қос боксшы финалда кездесіп, жеңісті төрешілер өзбекке берген болатын.
Хавасбектің тісі батқан жердің фотосын Абылайханның әйелі Индира Рахымберлина әлеуметтік желіге жүктеді. Артынша аталған оқиғаның видеосы да жария болды.
«Өзбекстан боксшылары тістеп бокстасты. Масқара! Бұл туралы жаңалықтарда жазылуы керек. Төреші мұны көрген жоқ, қапталдағы төрешілер де соқыр. Шынымен масқара тірлік. Егер жеңе алмасаңыз, тістеп алыңыз.
Оны тістеп алғанына аң-таң болдым. Егер сіз капа арқылы қалай тістеуге болады деп ойласаңыз, онда айтайын: капаны тек тістің үстіңгі қатарына ғана киеді. Егер фото мен видеоға қарасаңыз, онда сол жер қансырап тұрғанын көруге болады. Ұят», - деп жазды Индира өзінің Instagram-парақшасында.
Айта кетейік, Азия чемпионатында Қазақстан боксшылары 4 алтын алса, өзбектерден 8 боксшы чемпион атанды.
